Misdaad. Taak 4. Sekuriteitspan

 

Ek is sommer moerig.  Om in die middel van die nag al om ‘n vervalle plaasopstal te moet patroleer is erg genoeg, maar boonop moet ek ‘n span saamsleep.  En die kersie op die koek is dat niemand regtig wil saamkom nie.  Want die paartie wat die aandag moes aflei van die werklike misdaad, het ontaard in die eintlike attraksie.  Wie hou ‘n partie by ‘n murasie?  Met rookmasjiene?  En die hele spul is aangetrek in kleurvolle kostuums!!

Ek het die een spanlid probeer oortuig om van die blonde pruik ontslae te raak (ons patroleer… nie paradeer)  maar niks.  As wegkruipertjie met blou hare kan patroleer, kan sy met ‘n blonde pruik.  So nou loop ons hier in die donker met moerse goeie flitsligte en hoop die bure raak nie agterdogtig nie.  Asof.  Dis Suid Afrika.  2018.  Ons is NET agterdogtig oor mekaar.

Eintlik probeer ek my eie aandag aflei van wat voorlê.  Hoe op aarde gaan ons die geraas van koevoete en drilbore verdoesel?  Self met daardie oorverdowende musiek.  Ge Korsten op stereo.  Regtig?  Ek kan  net die bure agterna hoor vertel vir die polisie: “Hule moes aan die ou kant gewees het.  Die musieksmaak, jy weet.  Nou nie Paul Kruger oud nie, maar nogal naby….”

Na die derde sirkel roete om die plek, voel ons veilig genoeg om vir Sonell te laat weet dat sy die sementblad kan aanpak met haar span.

Persoonlik is ek seker elke by, spinnekop en slang het lankal gevlug.  Ek hoop net nie dis in daardie pragtige kleurvolle gypsie wa in nie.  Ek sien al hoe Lekkervurig net eenvoudig petrol oorgooi en aan die brand steek.

Word vervolg deur Sonell Skrywer

Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, klik op die paddatjie of die InLinkz skakel net daaronder:

http://www.inlinkz.com/new/view.php?id=763896